12 000 метр кооптуу балык уулоочу шаймандар: Токтогулда Экотехкөзөмөл кызматынын эки күндүк рейдинин жыйынтыгы

Жаратылыш ресурстары министрлигине караштуу Экологиялык жана техникалык көзөмөл кызматы Токтогул суу сактагычын мыйзамсыз балык уулоочу куралдардан тазалоо боюнча масштабдуу рейд өткөрдү. Эки күндүк рейддик иш-чаралардын алкагында суудан 12 000 метр синтетикалык тор чыгарылды. Мындай торлор экосистемага орду толгус зыян келтирип, балык запастарын жок кылат жана сууда сүзүүчү канаттуулар үчүн өлүмгө алып келүүчү тузакка айланат.

Инспекторлор биринчи сутканын ичинде эле 7 километр торду алып чыгып, акваторияны браконьердик кысымдан бошотту. Иштин жүрүшүндө ведомство алдын алуу иштерине өзгөчө көңүл буруп, балыкчылар жана эс алуучулар менен жаратылышты булгабоо жана балык уулоо эрежелерин сактоонун маанилүүлүгү жөнүндө түшүндүрүү иштерин жүргүздү.

Биологиялык ар түрдүүлүктү сактоо жана Кыргызстандын суу ресурстарын коргоо боюнча мамлекеттик контролду күчөтүүнүн алкагында, Экотехкөзөмөл кызматы мындай рейддерди өлкөнүн бардык ири суу объекттеринде үзгүлтүксүз жүргүзүп келет.