Жаратылыш ресурстары министрлигинде жыл жыйынтыгынын алкагында кызматкерлер сыйланды

Жаратылыш ресурстары министрлигинде жыл жыйынтыгынын алкагында кызматкерлер сыйланды

Кыргыз Республикасынын Жаратылыш ресурстары, экология жана техникалык көзөмөл министрлигинде жыл жыйынтыгын чыгаруу иш-чарасынын алкагында министрликтин бир катар кызматкерлери ведомстволук сыйлыктар менен сыйланды. Сыйлоо аземи министрликтин ишине активдүү катышып, ак ниет кызмат өтөгөн кызматкерлерди колдоо жана дем берүү максатында өткөрүлдү.

Салтанаттуу иш-чарада министр М. Машиев кызматкерлерге сыйлыктарды тапшырып, алардын өлкөнүн экологиялык коопсуздугун камсыздоого кошкон салымын жогору баалады.

Ошондой эле иш-чаранын жүрүшүндө министрдин орун басарлары да куттуктоо сөздөрүн айтып, ал эми социалдык тармактарда министрликтин ишмердүүлүгүн активдүү чагылдырган кызматкерлер сыйланышты.

Өз сөзүндө М. Машиев министрликтин 2025-жылы жетишкен бир катар маанилүү ийгиликтерине токтолуп, айлана-чөйрөнү коргоо, токой ресурстарын азыркы жана келечек муундар үчүн сактоо, абанын сапатын жакшыртуу, геология тармагын өнүктүрүү жана калдыктарды башкаруу боюнча системалуу иштер жүргүзүлгөнүн белгиледи.