Тазалык бизден башталат: Экотехкөзөмөл кызматынын инспекторлору Арашан жана Таш-Мойнок эс алуу жайларында түшүндүрүү иштерин жүргүзүштү

Кыргыз Республикасынын Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматынын Бишкек шаары жана Аламүдүн району боюнча регионалдык башкармалыгынын инспекторлору эл көп чогулган эс алуу жайларында күчөтүлгөн экологиялык рейд өткөрүштү.

Рейд жайкы сезон алдында шаардыктар арасында өзгөчө суроо-талапка ээ болгон Таш-Мойнок жана Арашан айыл аймактарынын аймагынан башталды. Иш-чаранын негизги максаты мүмкүн болгон мыйзам бузууларды аныктоо гана эмес, калк арасында кеңири түшүндүрүү иштерин жүргүзүү болду.

Стандарттык текшерүү форматынын ордуна инспекторлор жарандар менен түз баарлашууга басым жасашты. Эс алуучуларга тазалыкты сактоонун маанилүүлүгү, калдыктарды жок кылуу зарылдыгы жана жаратылыш ресурстарына аяр мамиле кылуу тууралуу кеңири маалымат берилди. Өзгөчө көңүл суу булактарын сактоо жана айлана-чөйрөнүн булганышына жол бербөө маселелеринө бурулду.

Рейддин жүрүшүндө инспекторлор жарандарды экологиялык жоопкерчиликке чакырып, жаратылыштын тазалыгын сактоо — ар бир адамдын милдети экенин эскертишти. Ошондой эле жергиликтүү бийлик өкүлдөрү менен да иш алып барылып, аларга калк арасында маалыматтык колдоону жана алдын алуу иш-чараларын күчөтүү сунушталды.

Кыргыз Республикасынын Жаратылыш ресурстары, экология жана техникалык көзөмөл министрлиги борбор калаанын тургундарына жана конокторуна эскертет: өлкөнүн жаратылыш байлыктарын биргелешкен аракеттер менен гана сактап калууга болот. Тазалык, тартип жана айлана-чөйрөгө аяр мамиле кылуу — бул ар бир жарандын жалпы жоопкерчилиги.