Ысык-Көл жээгинде «Таза жээк» экологиялык акциясы өткөрүлдү

2022-жылдын 26-апрелиндеги Кыргыз Республикасынын Президентинин жарлыгын аткаруунун жана «Уңгу жол» улуттук өнүгүү программасын ишке ашыруунун алкагында Ысык-Көл жээгинде ири масштабдагы «Таза жээк» экологиялык акциясы өткөрүлдү.

Иш-чаранын максаты — Ысык-Көлдүн уникалдуу экосистемасын сактоо, жээк тилкесин таштандылардан тазалоо жана коомчулуктун көңүлүн пластикалык калдыктардын көйгөйүнө буруу.

Акцияга Кыргыз Республикасынын жаратылыш ресурстары, экология жана техникалык көзөмөл министри М.Машиев , министрдин биринчи орун басары К. Касейинов , министрдин орун басары М.Аманкулов жана министрликтин кызматкерлери катышты.

Министр өз сөзүндө төмөнкүлөргө токтолду :

«Адам менен жаратылыштын гармониясы, айлана-чөйрөгө аяр мамиле кылуу — биздин артыкчылыктуу багытыбыз. Мындай демилгелер жээктерди тазалоо менен катар эл арасында экологиялык маданиятты калыптандырууга да өбөлгө түзөт».

Акциянын негизги максаттары:

 • Ысык-Көл жээгин таштандылардан тазалоо;

 • Пластикалык калдыктардын көлөмүн кыскартуу;

 • Экологиялык жактан туруктуу туризм маданиятын жайылтуу.

Мындан тышкары, иш-чаранын алкагында пластик баштыктардын зыяны жана аларга альтернатива каражаттар тууралуу маалымат берген презентация өткөрүлдү.

Ысык-Көлдө өткөрүлүп жаткан мындай экологиялык акциялар — мамлекет менен коомчулуктун биргелешкен аракети, жана жаратылышты келечек муундар үчүн сактап калуу аракетиндеги маанилүү салым болуп эсептелет.