Ак-Шоро участогунан фоторепортаж: Беш-Арал коругундагы жапайы жаратылыш

Беш-Арал мамлекеттик жаратылыш коругунун 6-айлануусуна караштуу Ак-Шоро участогунда орнотулган фототузактар жапайы жаныбарлардын сейрек учурларын тартып алууга мүмкүндүк берди. Бул сүрөттөр – Кыргызстандын жаратылыш кереметтеринин бири болгон бул аймактагы биологиялык ар түрдүүлүктү сактоо жана изилдөө ишине чоң салым болуп саналат.

Беш-Арал мамлекеттик жаратылыш коругу 1979-жылы Чаткал өрөөнүнүн батыш бөлүгүндө жайгашкан уникалдуу жаныбарлар жана өсүмдүктөр дүйнөсүн коргоо максатында түзүлгөн. Жалпы аянты – 112 018 гектар.

Корук төмөнкү чек араларга ээ:

Түндүктөн — Пскема тоо кыркасы аркылуу: Алям ашуусунан (1990,4 м) Казан-Булак (3364,5 м), Ак-Таш (3461,4 м) жана Чоң-Таш (2238,2 м) тоолору аркылуу өтөт;

Түштүк-чыгыктан — Терс дарыясы жана Өзбекстан Республикасынын мамлекеттик чек арасы менен өтөт, эң түштүк чекити — Кара-Сай ашуусу (3233,2 м);

Чыгыштан — Чоң-Таш тоолору, Беш-Арал (2007,4 м) жана Катта-Күмбел (2915,1 м) ашуулары аркылуу Терс дарыясына чейин созулат.

🌲 Корук төмөнкү төрт токой чарбасынан турат:

Кен-Булуң токой чарбасы — 34 447 га

Баркырак токой чарбасы — 30 661,7 га

Араб токой чарбасы — 21 639,3 га

Сандалаш токой чарбасы — 25 471,5 га

2016-жылы Беш-Арал мамлекеттик жаратылыш коругу ЮНЕСКОнун дүйнөлүк мурастар тизмесинин алдын ала тизмесине киргизилген. Бул коруктун глобалдык экологиялык маанисин тастыктап турат.

📷 Ак-Шоро участогунан тартылган фототузак сүрөттөрү жапайы жаратылыштын кооздугун жана аймактын фаунасынын байлыгын көрсөтүп турат. Бул — коруктун кызматкерлери тарабынан жүргүзүлүп жаткан тынымсыз эмгектин жыйынтыгы.