Кыргызстан климаттын өзгөрүүсү боюнча БУУнун РКИК көмөкчү органдарынын 62-сессиясына катышты
01-июль 2025, 11:43
2025-жылдын 16–26-июнь күндөрү Германиянын Бонн шаарында Климаттын өзгөрүшү боюнча БУУнун Алкактуу конвенциясынын (БУУ КӨАК) Кошумча органдарынын 62-сессиясы (SB62) болуп өттү. Бул иш-чарага Кыргыз Республикасынын делегациясы катышты. Делегациянын курамына Кыргыз Республикасынын Жаратылыш ресурстары, экология жана техникалык көзөмөл министрлигинин жана башка тиешелүү мамлекеттик органдардын өкүлдөрү кирди. Делегацияны Кыргыз Республикасынын Президентине караштуу Тоолуу аймактарды өнүктүрүүнүн беш жылдыгын ишке ашыруу боюнча атайын өкүлү Динара Кемелова жетектеди.
Конференциянын алкагында төмөнкү жогорку деңгээлдеги жолугушуулар болуп өттү:
БУУнун Климат боюнча конференциялар жыйынынын (СОР30) алдыдагы төрагасы мырза Андре Аранья Корреа ду Лаго менен;
БУУнун КӨАКтын Аткаруучу катчысы мырза Саймон Стилл менен;
Адаптациялык фонддун жетекчиси мырза Микко Оллыкайнен менен;
КОАКтын Илимий-техникалык консультациялар боюнча кошумча органын (SBSTA) төрагасы мырза Адония Айебаре менен;
Тышкы иштер министринин орун басары жана СОР29дун башкы сүйлөшүүчүсү мырза Ялчин Рафиев менен;
БУУ КӨАК Катчылыгынын Эл аралык байланыштар боюнча кеңсесинин жетекчисинин орун басары айым Грейс Энн Смит менен;
Катчылыктын Адаптация боюнча тобунун жетекчиси айым Роджина Манандар менен.
Жолугушууларда климаттык күн тартибиндеги артыкчылыктуу маселелер, Кыргызстандын тоолуу аймактарды туруктуу өнүктүрүү боюнча демилгелерин илгерилетүү жана эл аралык климаттык каржылоого жетүү мүмкүнчүлүктөрүн кеңейтүү маселелери талкууланды.
Кыргызстан Тоо өнөктөштүгү Катчылыгы менен биргеликте «Чокулардан жогору: тоолуу аймактарда климаттын өзгөрүшүнө каршы аракеттер үчүн кызыкдар тараптарды мобилизациялоо» аттуу тематикалык иш-чараны уюштурду. Бул иш-чарага тоолуу өлкөлөрдүн – Непал, Бутан, Андорра, Эквадор, Армения, Тажикстан, Казакстан жана Азербайжан сыяктуу мамлекеттердин өкүлдөрү, ошондой эле бир катар эл аралык уюмдар: БУУнун КӨАК, ICIMOD, INBAR жана башкалар катышты.
Кыргызстандын делегациясы ошондой эле бир катар тематикалык иш-чараларга катышты, алардын катарында:
«УДАСты күчөтүү: эффективдүү мониторинг аркылуу», Сальвадор өкмөтү жана ICAT (Климаттык аракеттердин транспаренттүүлүгүн камсыздоо демилгеси) тарабынан уюштурулган;
«Адаптация боюнча глобалдык максаттарга жетишүү», Непал жана ICIMOD (Тоолуу аймактарды комплекстүү өнүктүрүү боюнча эл аралык борбор) тарабынан уюштурулган;
«Климаттын өзгөрүшүнө каршы аймактык аракеттерди тездетүү: 2026-жылдагы регионалдык климаттык саммитке карай», Казакстан Республикасы тарабынан уюштурулган.
Делегация ошондой эле 15тен ашык мамлекеттер, анын ичинде Индия, Австрия, Эквадор, Пакистан, Лаос, Шри-Ланка, Буркина-Фасо, Мали, Танзания жана башкалар менен тоо маселелерин сүйлөшүү процесстерине интеграциялоо максатында эки тараптуу консультацияларды өткөрдү.
Маанилүү окуялардын бири — Кыргызстандын жана Андорранын демилгеси менен түзүлгөн Тоо өнөктөштүгүнүн сүйлөшүүчү тобунун биринчи расмий жолугушуусу болду. Бул топко 11 мамлекет кирет. Жолугушууда тоо тематикасын БУУнун КӨАК программаларына, чечимдерине жана процесстерине интеграциялоо жолдору талкууланды.
Кыргыз Республикасынын делегациясы ошондой эле бир катар сүйлөшүү сессияларына катышты, алар төмөнкү темаларды камтыды:
Адаптация боюнча глобалдык максаттар;
Адилеттүү өтүүнү камсыз кылуу программасы;
Амбицияны жана ишке ашырууну жогорулатуу программасынын уландысы;
Глобалдык сереп (Global Stocktake) боюнча процессуалдык жана мазмундук аспекттер;
Глобалдык серептин жыйынтыктарын ишке ашырууга багытталган БАЭнин диалогу боюнча модалдуулуктар.
