Кыргызстан Астанада өтүп жаткан министрлер жыйынында “Түрктөрдүн жашыл көз карашын” иш жүзүндө ишке ашырууга чакырды

2026-жылдын 23-апрелинде, Астана ш. — Казакстандын борборунда Регионалдык экологиялык саммиттин (РЭС-2026) экинчи күнүнүн алкагында Түрк мамлекеттер уюмуна (ТМУ) мүчө өлкөлөрдүн курчап турган чөйрө жана экология үчүн жооптуу министрлеринин Экинчи жыйыны өтүүдө.

Иш-чарага Кыргызстандын, Азербайжандын, Казакстандын, Түркиянын, Өзбекстандын делегациялары жана ТМУнун Башкы катчысы Кубанычбек Өмүралиев катышууда. Жолугушуунун негизги темасы — Бишкекте өткөн ТМУ Саммитинде кабыл алынган «Түрктөрдүн жашыл көз карашы — Туруктуу келечек үчүн биримдик» стратегиясынын алкагында декларациялардан экологиялык долбоорлорду системалуу ишке ашырууга өтүү болду.

Кыргыз Республикасынын Жаратылыш ресурстары, экология жана техникалык көзөмөл министри А.Т. Токтобаев кесиптештеринин алдында сүйлөп жатып, климаттык чакырыктардын алдында түрк мамлекеттеринин тилектештигинин стратегиялык маанилүүлүгүн баса белгиледи.

«Тоолуу өлкө катары Кыргызстан үчүн климаттын өзгөрүшүнүн кесепеттери — бул абстракттуу глобалдык талкуу эмес, биздин жарандардын коопсуздугуна жана бакубаттуулугуна таасир этүүчү күнүмдүк реалдуулук. Бүгүнкү жолугушуу билдирүүлөрдөн системалуу ишке ашырууга, ниеттерден конкреттүү натыйжаларга өтүүнүн кадамы болушу керек. Биз Уюмдун алкагындагы экологиялык кызматташтык биринчи кезекте практикалык багытта өнүгүшү керек деп ишенебиз», — деп билдирди министр А.Т. Токтобаев.

Жолугушууда сунушталган КРнын негизги жетишкендиктери жана демилгелери:

ОНУВ 3.0: 2025-жылы өлкөнүн 2035-жылга чейинки климаттык саясатын аныктаган жаңыртылган салымдын (ОНУВ 3.0) жактырылышы.

Илбирстерди коргоо: Ак илбирсти коргоого өзгөчө көңүл бурулуп, КРда алардын саны 500дөн ашты жана «Ак Илбирс» экологиялык коридору түзүлдү.

«Жашыл Мурас»: Бул кампаниянын алкагында Кыргызстанда 8,2 млн көчөт отургузулду, бул аймактык экосистемаларды калыбына келтирүүгө кошулган салым болуп калды.

Пластикке тыюу салуу: Кыргызстан аймактагы өлкөлөрдүн ичинен биринчилерден болуп өзгөчө корголуучу жаратылыш аймактарында пластик буюмдарын чектөө жөнүндө мыйзам кабыл алды.

Сөзүнүн аягында министр А.Т. Токтобаев ТМУ өлкөлөрүнүн делегацияларын 2027-жылы өтө турган «Бишкек+25» экинчи Глобалдык тоо саммитине катышууга чакырды. Ведомство башчысы мөңгүлөрдү коргоо жана суу ресурстарын сарамжалдуу пайдалануу үчүн биргелешкен эксперттик жумушчу топторду түзүүгө жана аймактык инвестициялык долбоорлорду ишке ашырууга чакырды. 

Министрлердин жолугушуусу ишин улантууда. Тараптар жерлердин деградациясына жана климаттын өзгөрүшүнө каршы күрөшүү үчүн маалымат жана технологиялар менен алмашуунун конкреттүү механизмдерин талкуулашат деп күтүлүүдө.

---

#РЭС2026 #АкылТоктобаев #ТМУ #ОТГ #ЖаратылышРесурстарыМинистрлиги #Кыргызстан #Бишкек25 #ЖашылМурас #Климат #Астана #ТүркДүйнөсү