КР Жаратылыш ресурстары министрлиги Джеруйдагы “Альянс Алтын” компаниясынын ишмердүүлүгү менен таанышты: басым — жер казыналарын рационалдуу пайдаланууга, коопсуздукка, экологияга жана ачыктыкка

Жумушчу сапардын алкагында Кыргыз Республикасынын Жаратылыш ресурстары, экология жана техникалык көзөмөл министрлигинин орун басары — Кыргыз геология кызматынын директору Марат Жусупбеков Талас облусундагы Джеруй алтын кени менен таанышып чыкты. Бул кенди иштетүү менен “Альянс Алтын” компаниясы алектенет.

Сапар учурунда негизги көңүл өнөр жай жана экологиялык коопсуздукка, жер казыналарын рационалдуу пайдаланууга, мыйзамдардын сакталышына жана инвестордун социалдык жоопкерчилигине бурулду. Жусупбеков жеринде руданы кайра иштетүү процесси, экологиялык мониторинг системасы жана айлана-чөйрөгө тийгизген таасирди азайтуу чаралары менен таанышып чыкты.

Айрыкча, сууну жабык айланма система менен камсыздоо белгиленип, бул система суу сактагычтарга агынды сууларды чыгарууну толук четтетет.

«Заманбап жер казынасын пайдалануу жогорку деңгээлдеги экологиялык жоопкерчиликсиз мүмкүн эмес. Ачык-айкындуулук, мыйзамдуулук жана коопсуздук — бул мамлекет менен инвестордун кызматташуусу курулушу керек болгон негизги принциптер», — деп белгиледи Марат Жусупбеков.

Маалымат үчүн:

"Альянс Алтын" компаниясы өз ишин 2015-жылы баштаган жана ошол убактан бери Кыргызстандын бюджетине 28,4 миллиард сомдон ашуун суммадагы салыктарды жана социалдык төлөмдөрдү төлөгөн. 2025-жылдын апрель айында эле 2 миллиард сомго жакын каражат түшкөн, анын ичинен 1,59 миллиард сом алтын сатуу аркылуу алынган.

Ишкана жылына 1,3 миллион тоннанын үстүндө руданы кайра иштете алган заманбап өндүрүш линиясына ээ. 2021-жылдан бери 17,6 тонна алтын өндүрүлгөн жана учурда жер астындагы казуу иштерине даярдыктар жүрүп жатат.

"Альянс Алтын" регионду өнүктүрүүгө активдүү салым кошуп келет: компаниянын өнүктүрүү фондуна 1,2 миллиард сом бөлүнүп, мектептерди курууга, саламаттык сактоону, спортту колдоого жана жашоо шартын жакшыртууга жумшалууда. Мындан тышкары, Талас облусунун тургундарына жана мамлекеттик мекемелерине 317,8 миллион сом жардам көрсөтүлгөн.

Андан тышкары, компания алтын сатуудан түшкөн кирешенин 2% жергиликтүү инфраструктураны өнүктүрүүгө багыттайт. Бүгүнкү күндө бул максатта облустук, райондук жана айылдык деңгээлдеги долбоорлорду ишке ашырууга 2 миллиард сомго жакын каражат колдонулган.