КР жаратылыш ресурстары министрлиги экологиялык көзөмөлдү күчөтүүдө: «Full Gold Mining» компаниясынын кенине болгон жумушчу сапар

18-июль 2025, 09:56

Жалал-Абад өрөөнү

2025-жылдын 17-июлу

Чаткал району, Жалал-Абад облусу

Кыргыз Республикасынын жаратылыш ресурстары, экология жана техникалык көзөмөл министринин орун басары — Кыргыз геологиялык кызматынын директору Марат Жусупбеков мамлекеттик экологиялык, тоо-кен жана геологиялык талаптардын сакталышын көзөмөлдөөнү күчөтүү максатында «Full Gold Mining» ЖЧКсына таандык кенге жумушчу сапар менен барды.

Сапардын максаты

Иш сапардын максаты – жаратылышты коргоо талаптарынын, санитардык стандарттардын сакталышын текшерүү жана жер казынасын туруктуу өздөштүрүү маселелерин экологияга тийгизе турган терс таасирлерди минималдаштыруу шартында талкуулоо болду.

Аныкталган мыйзам бузуулар:

Кен аймагын текшерүүнүн жүрүшүндө бир катар олуттуу экологиялык жана санитардык эрежелердин бузулганы белгиленди.

Анын ичинде:

металл калдыктары жана концентрат калдыктары айланып жаткан аймактарга ташталып калган;

байытуучу фабриканын ишмердүүлүгү токтоп турган;

медициналык калдыктар туура эмес жана кооптуу жайгаштырылган;

өнөр жай калдыктары топтолуп калган;

химиялык реагенттердин сактоо эрежелери бузулган (анын ичинде фильтр-пресстерде реагент калдыктары бар);

мыйзамсыз дарак кыйуулар (арча дарактарын кошкондо) жана куурап калган өсүмдүктөр бар;

№6 кен жолу булганган суунун таштандылардын арасынан агып чыгып жатканы санитардык нормаларга каршы келери аныкталды.

Көрүлгөн чаралар

Марат Жусупбеков «Full Gold Mining» ЖЧКсынын жетекчилигине оозеки эскертүү берип, Экологиялык жана техникалык көзөмөл кызматына Кыргыз Республикасынын мыйзамдарына ылайык тийиштүү чараларды көрүү максатында кенде кеңири текшерүү жүргүзүүнү тапшырды.

Кыргыз Республикасынын Жаратылыш ресурстары, экология жана техникалык көзөмөл министрлиги өлкө аймагындагы жер казуу иштерине болгон мамлекеттик көзөмөлдү күчөтүү жана туруктуу жаратылыш пайдалануу багытындагы ишин улантат.