Атмосфералык абанын сапатын жакшыртуу максатында рейд өткөрүлдү

Кыргыз Республикасынын Жаратылыш ресурстары, экология жана техникалык көзөмөл министрлиги, Жол кыймылынын коопсуздугун камсыздоо башкы башкармалыгы , Экологиялык жана техникалык көзөмөл кызматынын Бишкек-Аламүдүн   жана башка тиешелүү мекемелердин өкүлдөрү менен биргеликте абаны булгаган жүк унааларын аныктоо боюнча рейд өткөрүлдү. Иш чаранын максаты— атмосфералык абанын сапатын жакшыртуу жана экологиялык көзөмөлдү күчөтүү. Бул иш-чара 2025-жылдын 28-мартындагы №221 тескеменин негизинде түзүлгөн Кыргыз Республикасында атмосфералык абанын сапатын жакшыртуу боюнча ведомстволор аралык комиссиясынын төрагасы М.А. Машиевдин тапшырмасына ылайык жүргүзүлдү.

Иш чарага Б.Н. Ельцин атындагы Кыргыз-Россия Славян университетинин өкүлдөрү дагы катышып, газоанализаторлору жана чаң бөлүкчөлөрүнүн эсептегичи менен жабдылган «ПОЛАР-2», «СЕНСОН-М», «ИНФРАКАР-М» көчмө экологиялык лабораториясы аркылуу өлчөөлөр жүргүзүлдү. 

Профсоюз көчөсүндө инспекторлор жүк ташуучу унаалардын түтүн бөлүп чыгаруучу түтүктөрүн текшеришти. Министрликтин атмосфералык абаны коргоо бөлүмүнү башкы адиси  Абдумалик уулу Чынгызбектин айтымында, дизелдик унаалар үчүн түтүндүүлүк көрсөткүчү 50%дан ашпашы керек. Айрым унааларда бул көрсөткүч 90%га жетти.

Эреже бузгандарга Кыргыз Республикасынын укук бузуулар кодексинин 234-беренеси боюнча протоколдор түзүлдү. Ага ылайык, жеке жактарга 7500 сом, юридикалык жактарга 23000 сом өлчөмүндө айып пул салууга алып келет

2025-жылдын башынан бери Бишкек боюнча 1,88 миллион сомдук айып пул салынды. Министрлик мындай рейддерди өлкө боюнча жумасына бир жолу өткөрүүнү пландоодо жана жарандарды автоунааларын техникалык жактан таза абалда кармоого чакырууда.

Министрлер Кабинетинин алдындагы транспорт каражаттарын жана айдоочуларды каттоо боюнча мамлекеттик агенттиктин маалыматына ылайык, 2024-жылы өлкөдө 1,67 миллион автоунаа катталган, алардын 80%дан ашыгы 15 жылдан ашкан. Бишкекте мындай унаалардын саны 330 миңден көп. Алардын көбү заманбап экологиялык талаптарга жооп бербейт. Катализаторлордун иштөө мөөнөтү 80 000–160 000 км же 7–10 жыл менен чектелет. Шаар мэриясынын маалыматы боюнча, кирип-чыгып жаткан унаалар менен кошо Бишкекте күн сайын 750 миңден ашык унаа жүрөт, — деп  кошумчалады Министрликтин атмосфералык абаны коргоо бөлумүнүн башчысы Ташыбек уулу      Нурсултан.