Уникалдуу биологиялык ар түрдүүлүктү сактоого жана аймакты туруктуу өнүктүрүүгө кадамдар

Кыргыз Республикасынын Экология, Геология жана жаратылыш ресурстары министри М.Машиев Улуттук суу форумунда "Климаттын өзгөрүү шарттарында Ысык-Көлдүн экологиялык абалы" деген аталыштагы докладында Ысык-Көлдүн кайталангыс жаратылыш байлыгын сактоонун маанилүүлүгүн баса белгиледи. Ал белгилегендей, Ысык-Көл дүйнөлүк коомчулук тарабынан таанылган жана анын айланасындагы аймактар эл аралык жаратылышты коргоо тизмелерине киргизилген, бул региондун экосистемасын коргоодогу маанилүү кадам болуп саналат.

Министр өз баяндамасында Ысык-Көл ойдуңунун биологиялык ар түрдүүлүгүн сактоого өзгөчө көңүл буруу зарылдыгын белгиледи. Бул уникалдуу экосистемада канаттуулардын 100дөн ашык түрү, анын ичинде 42 саздак түрү жашайт. Көлдүн сууларында балыктын 34 түрү, ошондой эле омурткасыздардын 519 түрү кездешет. Жейрендердин санын калыбына келтирүү үчүн реинтродукция программасынын алкагында алар Өзбекстандан киргизилген

Жаратылышты коргоо потенциалын чыңдоонун алкагында Ысык-Көлдүн экосистемасынын абалы жөнүндө маалыматтарга мониторинг жүргүзүү системасын бекемдөө боюнча иштер улантылууда, ал өзүнө көлдүн физикалык жана химиялык абалын изилдөөнү жана экосистемадагы өзгөрүүлөрдү так баалоо үчүн маалыматтарды чогултууну камтыйт. Бул багытта мөңгүлөрдү сактоо жана суу ресурстарын сарамжалдуу пайдалануу да маанилүү кадам болуп саналат, ал өзүнө ирригациялык системаларды модернизациялоону жана суу ресурстарын сактоо боюнча башка иш-чараларды камтыйт.

Региондун биологиялык ар түрдүүлүгүн сактоо жана калыбына келтирүү, анын ичинде жаныбарлар жана өсүмдүктөр дүйнөсүнүн балансын колдоо боюнча чаралар да маанилүү болуп саналат. Айрыкча, жок болуп кеткен түрлөрдүн, анын ичинде жейрендердин популяциясын калыбына келтирүү, ошондой эле жергиликтүү фаунага коркунуч туудурган инвазиялык түрлөр менен күрөшүү аракеттери жүрүп жатат. 

Ысык-Көлдүн туристтик потенциалын максатка ылайык пайдалануу да иштин маанилүү багыттарынын бири болуп саналат. Бул контекстте аймактын экосистемасын сактоого, ошондой эле экологиялык талаптарды эске ала турган туруктуу туризм үчүн шарттарды түзүүгө көмөктөшүүчү экотуризм жана таштандыларды башкаруу долбоорлору жигердүү өнүгүүдө.

Аталган милдеттерди чечүү жана Ысык-Көлдүн кайталангыс жаратылыш мурасын коргоо үчүн системалуу чаралар көрүлүүдө, алар мыйзамдык демилгелерди, ошондой эле жаратылыш балансын калыбына келтирүү, экосистемалардын сапатын жакшыртуу жана ресурстарды сарамжалдуу пайдалануу боюнча практикалык кадамдарды камтыйт.