Кыргызстанда климаттын өзгөрүшүнө карата Улуттук адаптациялык пландын долбоору талкууланды

19-март 2025-жылы ПРООН-ЖКФ "Кыргыз Республикасында климаттын өзгөрүшүнө адаптациялык чараларды орто мөөнөттүү жана узак мөөнөттүү пландаштыруу жана ишке ашыруу үчүн Улуттук адаптациялык планды (УАП) иштеп чыгуу процессин илгерилетүү" долбоорунун алкагында УАП долбоорун талкуулоо боюнча тегерек стол болуп өттү. 

Иш-чарага мамлекеттик органдардын, эл аралык уюмдардын, илимий коомчулуктун жана жарандык сектордун өкүлдөрү катышты. Жаратылыш ресурстары министринин орун басары А.Раимкулова белгилегендей, УАП өлкөнүн климаттык өзгөрүүлөргө болгон чабалдыгын азайтуу үчүн негизги механизм болуп саналат. Кыргызстан Париж келишиминин максаттарына берилген бойдон калууда жана адаптациялоо чараларын Улуттук саясатка интеграциялоо боюнча активдүү кадамдарды жасоодо. 

"Парник газдарынын чыгарылышын кыскартуу жана климаттын өзгөрүшүнө адаптациялоо боюнча Кыргызстандын милдеттенмелерин аткарууда Улуттук аныкталган салым негизги ролду ойнойт. Министрлик планды камтууну кеңейтүү жана кошумча секторлорду киргизүү үчүн өнөктөштөр, анын ичинде Азия Өнүктүрүү Банкы менен активдүү өз ара аракеттенүүдө", – деп белгиледи А.Раимкулова. 

Жаңыланган УАП долбооруна эки жаңы багыт кошулду – энергетика жана шаарларды туруктуу өнүктүрүү, буга чейин бөлүнгөн секторлорду толуктоо: 

* табигый кырсыктарды жана өзгөчө кырдаалдарды башкаруу, 

* саламаттыкты сактоо, 

* биологиялык ар түрдүүлүктү сактоо, 

* Айыл чарба жана ирригация. 

Долбоордун алкагында УАП консолидациясы аяктады, мониторинг жана баалоо системасы иштелип чыкты, ошондой эле адаптациялоо боюнча алты сектордук жана үч аймактык план даярдалды. 

БУУӨПтүн Кыргыз Республикасындагы Туруктуу өкүлү А.Соловьева белгилегендей, (УАП) ийгиликтүү ишке ашыруу бардык кызыкдар тараптардын, анын ичинде бизнес жана жарандык коомдун активдүү катышуусусуз мүмкүн эмес. 

Долбоор Азия өнүктүрүү банкы (АӨБ) жана БУУӨП менен өнөктөштүктө иштелип чыкты, бул анын камтылышын кеңейтүүгө жана туруктуу өнүгүүнүн дымактуу максаттарын интеграциялоого мүмкүндүк берди. 

Жаратылыш ресурстары министрлиги катышуучуларды өлкөнүн климаттык саясатын түзүүгө активдүү сунуштарды киргизүүгө жана катышууга үндөдү. УАП келечектеги реформалар жана Кыргызстандын климаттык тобокелдиктерин азайтууга жана туруктуу өнүктүрүүгө багытталган долбоорлор үчүн негиз болот.