Чүй облусунун тоолуу аймактарынын биринде эс алуучулар тоо текелеринин табигый шарттагы өзгөчө жүрүм-турумуна күбө болушту.

Эс алуучулар тарабынан тартылган видеодо эки тоо текенин бири-бири менен күч сынашып, сүзүшүп жаткан учуру чагылдырылган. Жаныбарлардын айланасында башка тоо текелер жана эчкилер чогулуп, алардын аракетин байкап турганын көрүүгө болот.

Тоо текелеринин мындай күч сынашуусу жаныбарлардын табигый жүрүм-турумунун бир көрүнүшү болуп саналат. Айрыкча көбөйүү мезгилинде эркек текелердин ортосундагы атаандаштык күчөп, алар өз ара үстөмдүк орнотуу үчүн күч сынашы мүмкүн.

Жаратылыштагы мындай көрүнүштөр биологиялык ар түрдүүлүктүн маанилүү бөлүгү болуп саналат. Тоолуу аймактарда жашаган жапайы жаныбарлардын табигый жашоо чөйрөсүн сактоо жана аларга тынч шарт түзүү жаратылышты коргоонун негизги багыттарынын бири.

Жаратылыш ресурстары, экология жана техникалык көзөмөл министрлиги жарандарды жапайы жаныбарларга аяр мамиле кылууга, алардын жашоо чөйрөсүнө кийлигишпөөгө жана жаратылышта жүрүүдө экологиялык эрежелерди сактоого чакырат.