Абанын булганышы боюнча маселе ведомстволор аралык комиссиянын көзөмөлүндө калууда

Жаратылыш ресурстары, экология жана техникалык көзөмөл министрлигинде М.Машиевдин жетекчилиги астында Кыргыз Республикасындагы абанын сапатын жакшыртуу маселелери боюнча ведомстволор аралык комиссиянын жыйыны өттү.

Жылытуу мезгили аяктаганына карабастан абанын булганышына каршы күрөшүү өкмөттүн артыкчылыктуу багыттарынын бири бойдон калууда. Министрлик өзгөчө Бишкек шаарынын жана Чүй облусунун экологиялык абалын жакшыртуу боюнча чараларды ишке ашырууну улантууда.

Комиссия мүчөлөрү негизги кандай маселелерди талкуулашты?

Кара-Кече көмүрүн брикеттөө

Зыяндуу аралашмалары аз болгон көмүр брикеттерин колдонуу булгоочу чыгындылардын көлөмүн бир топ кыскартат. Комиссия көмүрдүн экологиялык жактан таза түрлөрүн өндүрүүнү жана өндүрүшкө киргизүүнү стимулдаштыруу механизмдерин карап жатат.

Жеңилдетилген кредиттөө боюнча пайыздык ченди төмөндөтүү

Экологиялык таза энергия булактарына өтүү жана жылуулук системаларын модернизациялоо үчүн ишканалар жана жеке чарбалар үчүн кредиттердин ставкаларын төмөндөтүү сунушталууда, бул абанын булганышын азайтат.

Аймактарда булганууга мониторингди кеңейтүү

Мекемелер аралык комиссиянын жыйынын абанын булганышы байкалган Ош, Жалал-Абад жана Талас шаарларында да өткөрүү чечими кабыл алынды. Бул максатта кошумча мониторинг посттору жайгаштырылып, зыяндуу заттардын чыгышын азайтуу боюнча аймактык программалар сунушталат.

Жыйында долбоордун автору А.Салымбаев тарабынан катуу бөлүкчөлөрдөн абага бөлүнүп чыгууларды тазалоого жана абанын булгануу деңгээлин төмөндөтүүгө мүмкүндүк берген инновациялык циклон фильтринин бет ачары болду.