Ысык-Көлдүн таза жээктери: Тоң районунда ишембилик өттү

Ысык-Көлдүн таза жээктери: Тоң районунда ишембилик өттү

1-декабрь, 2025-жыл, Тоң району. Ысык-Көл облусунун Тоң районунда көлдүн жээктерин тазалоо боюнча масштабдуу акция болуп өттү. Аймактын кайталангыс жаратылышын сактоого багытталган бул иш-чарага ар кандай ведомстволордун жана коомдук уюмдардын өкүлдөрү активдүү катышты.

Ишембиликке Жаратылыш ресурстары, экология жана техникалык көзөмөл министрлигинин Ысык-Көл облусундагы бардык бөлүмдөрү катышты, анын ичинде:

Министрликтин аймактык башкармалыгы;

Кыргыз Республикасынын Экологиялык жана техникалык көзөмөл кызматынын аймактык башкармалыгы;

Жаратылыш парктарынын жана "Ысык-Көл" биосфералык аймагынын өкүлдөрү.

Акция белгилүү эко-активист Андрей Панаев жана спорттук балык уулоо клубдарынын өкүлдөрү менен биргеликте уюштурулду.

Иш-чаранын катышуучулары жээк тилкелерин жана эс алуучу жайларды тиричилик таштандыларынан тазалашты. Биргелешкен аракеттердин натыйжасында бир унаа толук катуу тиричилик калдыктары чогултулду. Эс алуучулар көп барган жаратылыш аймактары тартипке келтирилип, кыйла тазаланды.

Жаратылыш ресурстары министрлиги Андрей Панаевге иш-чараны натыйжалуу жана жогорку деңгээлде өткөрүүгө кошкон активдүү салымы жана колдоосу үчүн өзгөчө ыраазычылык билдирет. Ыраазычылык жана мындан аркы демилгелерди колдоо иретинде активистке министрликтин фирмалык продукциялары тапшырылды.

Жаратылыш ресурстары министрлиги бардык жашоочуларды жана конокторду өз жеринин жаратылышын баалап, сактоого чакырат: келечек муундар Ысык-Көлдүн кооздугуна суктанышы үчүн жээктерде, парктарда жана жаратылыш коруктарында тазалыкты сактайлы.